وفد 22 سے 30 ستمبر تک روانڈا میں قیام کے دوران تجارت، سرمایہ کاری، مشترکہ منصوبوں اور ٹیکنالوجی کے شعبوں میں نئے مواقع تلاش کرے گا،
پاکستان اور روانڈا کے درمیان معاشی روابط کے فروغ کے لیے کیگالی میں ہونے والی سرمایہ کاری کانفرنس کو افریقی منڈی میں پاکستانی کاروبار کی توسیع کی اہم کوشش قرار دیا جا رہا ہے۔
اسلام آباد(پاکستان واچ. نیوز )پاکستان افریقہ اکنامک کونسل کا کاروباری وفد 22 سے 30ستمبر تک روانڈا کا دورہ کریگا وفد دارالحکومت کیگالی میں منعقد ہونے والی پاک روانڈا انویسٹمنٹ کانفرنس میں شرکت کریگاپاکستان اور افریقہ کے درمیان تجارتی و معاشی روابط کو وسعت دینے کی اس کوشش کو ’’انگیج افریقہ‘‘ پالیسی کے عملی نفاذ کی جانب اہم قدم قرار دیا جا رہا ہے۔
پاکستان میں روانڈا کی ہائی کمشنر ہریریمانا فاتو اور پاکستان افریقہ اکنامک کونسل کے سرپرست اعلیٰ سفیر حامد اصغر خان نے مشترکہ پریس کانفرنس میں وفد کے دورے اور سرمایہ کاری کانفرنس کی تفصیلات بیان کیں۔ وفد میں پاکستانی کاروباری اور سرمایہ کار برادری کے نمائندے شامل ہیں جو روانڈا کے سرکاری اداروں، سرمایہ کاروں اور نجی شعبے کے نمائندوں سے تجارت، سرمایہ کاری، مشترکہ منصوبوں اور کاروباری شراکت داری کے امکانات پر بات چیت کریں گے۔
کانفرنس کے موقع پر پاکستان اور روانڈا کے درمیان دوطرفہ تجارتی معاہدے پر دستخط بھی متوقع ہیں، جس سے دونوں ممالک کے درمیان تجارتی روابط کے لیے ادارہ جاتی بنیاد مزید مضبوط ہونے کی توقع ہے۔
روانڈا کی ہائی کمشنر نے کہا کہ روانڈا پاکستانی کمپنیوں کے لیے مشرقی افریقہ کی وسیع منڈی تک رسائی کا گیٹ وے بن سکتا ہے۔ انہوں نے ٹیکسٹائل، تعمیرات، صحت، زراعت، مینوفیکچرنگ، ٹیکنالوجی اور انٹرپرینیورشپ سمیت مختلف شعبوں میں پاکستانی کاروباری اداروں کو سرمایہ کاری اور مشترکہ منصوبوں کی دعوت دی۔
سفیر حامد اصغر خان نے کہا کہ روانڈا میں امن و استحکام، سرمایہ کار دوست پالیسیوں، ہنرمند افرادی قوت اور کاروباری سہولتوں کے باعث پاکستانی سرمایہ کاروں کے لیے نئے امکانات موجود ہیں۔ انہوں نے ٹیکسٹائل، دواسازی، آئی ٹی، زراعت، صحت، تعمیرات اور انسانی ترقی کو پاکستان اور روانڈا کے درمیان تعاون کے اہم شعبے قرار دیا۔
انہوں نے کہا کہ پاکستان کی مینوفیکچرنگ صلاحیت اور روانڈا کی کپاس کی پیداوار کو باہم جوڑ کر ٹیکسٹائل کے شعبے میں مشترکہ منصوبے قائم کیے جا سکتے ہیں۔ ان کا کہنا تھا کہ افریقہ پاکستان کے لیے ایک بڑی ابھرتی ہوئی مارکیٹ ہے اور سیاسی قیادت کی جانب سے اس خطے کے ساتھ روابط بڑھانے کے لیے بروقت فیصلے ضروری ہیں۔
کانفرنس میں خواتین کی کاروباری شرکت اور نوجوانوں کے لیے روزگار و کاروباری مواقع پر بھی توجہ دی جائے گی۔ وزیراعظم یوتھ پروگرام کی فوکل پرسن ڈاکٹر روبینہ اعوان سمیت دیگر پاکستانی نمائندے بھی کانفرنس میں شرکت کریں گے۔
Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگانیزخبر کے مندرجات سےادارے کا متفق ہونا ضروری نہیں ۔اے آئی یا انٹرٹینمنٹ مواد صرف تفریح کے لیے ہے
