راولپنڈی (ویب ڈیسک)پاک فوج کے ترجمان لیفٹیننٹ جنرل احمد شریف چوہدری نے کہا ہے کہ افغانستان کو غیرریاستی عناصر چلا رہے ہیں، افغان طالبان حکومت بھارت کی پراکسی ہے اور اپنے مقاصد کے لیے کرائے کے جنگجو استعمال کر رہی ہے۔
عالمی خبر رساں ایجنسی رائٹرز کو دو روز قبل دیے گئے انٹرویو میں ڈی جی آئی ایس پی آر لیفٹیننٹ جنرل احمد شریف چوہدری نے افغان طالبان حکومت کے حوالے سے واضح مؤقف اختیار کرتے ہوئے کہا کہ بھارت پاکستان میں دہشت گردی کا سب سے بڑا اسپانسر ہے اور افغان طالبان رجیم بھارت کی پراکسی ہے۔
انہوں نے کہا کہ دہشت گرد تنظیمیں ٹی ٹی پی اور بی ایل اے بھی پاکستان کے خلاف بھارتی پراکسی ہیں، جبکہ افغان طالبان اپنے مذموم مقاصد کے لیے غیرریاستی عناصر اور کرائے کے جنگجو استعمال کر رہے ہیں۔
ڈی جی آئی ایس پی آر کا کہنا تھا کہ افغانستان کو اب بھی غیرریاستی عناصر چلا رہے ہیں، یہ ایک رجیم ہے۔ افغانستان میں روسی مداخلت کے بعد متعدد ایجنسیوں اور پراکسیز نے اپنی جڑیں مضبوط کرلی ہیں۔
انہوں نے کہا کہ جیش العدل، القاعدہ اور داعش خراسان (آئی ایس کے پی) جیسی بین الاقوامی دہشت گرد تنظیمیں بھی افغانستان میں موجود ہیں، جن کی نشاندہی اقوام متحدہ، امریکا اور کئی دیگر ممالک بھی کرچکے ہیں۔
لیفٹیننٹ جنرل احمد شریف چوہدری نے کہا کہ پاکستان افغان طالبان سے صرف یہ مطالبہ کرتا ہے کہ وہ پاکستان کے اندر دہشت گردوں کی حمایت بند کریں۔
ان کے مطابق افغان طالبان رجیم نے نور ولی محسود، بشیر زیب اور گل بہادر جیسے دہشت گردوں کو پناہ دے رکھی ہے۔ پاکستان میں دہشت گردی کی منصوبہ بندی افغانستان سے ہوتی ہے اور دہشت گردوں کو وہیں سے اسلحہ بھی فراہم کیا جاتا ہے
Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگانیزخبر کے مندرجات سےادارے کا متفق ہونا ضروری نہیں ۔اے آئی یا انٹرٹینمنٹ مواد صرف تفریح کے لیے ہے
