ممبی (ویب ڈیسک )بھارت میں سفاک اور لالچی شخص نے آن لائن ویڈیو دیکھ کر 4 افراد کو قتل کردیا۔بھارتی میڈیا کے مطابق ریاست تلنگانہ سے تعلق رکھنے والے شہری اسلم نے پیسوں کی خاطر اپنے ہی خاندان کے افراد کو قتل کیا۔
پولیس کے مطابق قتل کی واردات کا علم 22 جون کو اس وقت ہوا جب پڑوسیوں نے ایک گھر سے شدید تعفن اٹھنے کی شکایت کی۔
پولیس نے بتایا کہ ملزم اسلم کار ڈرائیور ہے جو حیدرآباد میں رہتا ہے، وہ اپنے شاہانہ طرز زندگی اور قرضوں کی وجہ سے مالی مشکلات کا سامنا کررہا تھا۔
پولیس کا کہنا ہےکہ اسلم نے ماضی میں اپنی بیوی کی خالہ حسینہ سے ایک لاکھ روپے ادھار لیے تھے، اس نے حال ہی میں حسینہ سے نئی کار خریدنے کے لیے ایک لاکھ روپے کے نئے قرض کے لیے رابطہ کیا جس پر حسینہ نے انکار کرتے ہوئے پچھلا قرض ادا کرنے کا مطالبہ کیا۔
اسلم کی اہلیہ تبسم اپنی خالہ حسینہ کے خلاف ذاتی رنجش رکھتی تھی تاہم تبسم نے شوہر کو خالہ کے گھر چوری کرنے کا مشورہ دیا، مالی مقاصد اور دشمنی کے باعث اسلم نے آن لائن ویڈیوز دیکھنا شروع کردیں۔
اپنے منصوبے کے مطابق اسلم مبینہ طور پر 19 جون کی صبح حسینہ کے گھر پہنچا اور اسے چاقو کے وار کرکے قتل کردیا، بعد میں اس نے حسینہ کے شوہر اور ان کے دو بچوں پر بھی حملہ کیا اور پھر گھر سے طلائی زیورات، زمین اور بینک کے کاغذات چوری کرکے فرار ہوگیا۔
اسلم نے چوری شدہ قیمتی سامان حیدرآباد کے ایک جیولر کے پاس ایک دوست کی مدد سے 5 لاکھ 30 ہزار روپے میں گروی رکھا۔
پولیس کے مطابق اسلم کے ساتھ اس کی بیوی اور اس کے دوست کو بھی گرفتار کرلیا گیا ہے جس نے قیمتی سامان گروی رکھنے میں اس کی مدد کی تھی تاہم کارروائی کرتے ہوئے جوہری کو بھی گرفتار کرلیا۔
Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگانیزخبر کے مندرجات سےادارے کا متفق ہونا ضروری نہیں ۔اے آئی یا انٹرٹینمنٹ مواد صرف تفریح کے لیے ہے
