کراچی: سہراب گوٹھ کے قریب کھلے نالے میں گرکر لاپتہ ہونے والے کمسن بچے کو بچانے کی کوشش کرنے والا نوجوان بھی ڈوب کر جاں بحق ہوگیا۔
کراچی (ویب ڈیسک )سہراب گوٹھ تھانے کی حدود کے علاقے مچھر کالونی میں واقع نور اسلام مسجد کے قریب کھیلتے ہوئے کم سن بچہ کھلے نالے میں گر کر ڈوب گیا، بچے کو بچانے کے لیے نالے میں کودنے والا نوجوان بھی ڈوب کر جاں بحق ہوگیا۔
بچے کو بچانے کیلئے نالے میں ڈوب کر جاں بحق ہونے والے نوجوان کی شناخت 17 سالہ گلاب ولد منظور کے نام سے ہوئی، جس کی لاش عباسی شہید اسپتال منتقل کردی گئی ہے۔
لاپتا بچے کی شناخت چار سالہ شاویز ولد جاوید کے نام سے ہوئی جس کی تلاش کے لیے ریسکیو اہلکار نالے میں سرچ آپریشن میں مصروف ہیں۔
ایس ایچ او تھانہ سہراب گوٹھ گل بیگ پنجیرو نے بتایا کہ 4 سالہ شاویز سائیکل چلا رہا تھا کہ اچانک سائیکل سمیت نالے میں گر گیا، موقع پر موجود نوجوان راہگیر نے بچے کو بچانے کی کوشش کرتے ہوئے نالے میں چھلانگ لگادی اور وہ خود بھی ڈوب کر جاں بحق ہوگیا۔
ترجمان ریسکیو 1122 سندھ کے مطابق سینٹرل کمانڈ اینڈ کنٹرول کو نالے میں بچے کے گرنے کی اطلاع موصول ہوتے ہی واٹر ریسکیو وہیکل، غوطہ خوروں اور ایمبولینس پر مشتمل ٹیم فوری طور پر جائے وقوعہ پر پہنچی، ریسکیو کارروائی کے دوران بچے کو بچانے کی کوشش کرنے نالے میں ڈوب کر جاں بحق ہونے والے نوجوان کی لاش نالے سے نکال لی گئی جبکہ لاپتا بچے کی تلاش کے لیے سرچ آپریشن جاری ہے۔
Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگانیزخبر کے مندرجات سےادارے کا
متفق ہونا ضروری نہیں ۔اے آئی یا انٹرٹینمنٹ مواد صرف تفریح کے لیے ہے
