ممبی (ویب ڈیسک )ڈاکٹر دلہن نے اپنی شادی کے دوران بھی فرض کی ادائیگی کرکے سوشل میڈیا صارفین کے دل جیت لیے۔
رپورٹ کے مطابق بھارت کی ریاست کیرالا سے تعلق رکھنے والی ڈاکٹر شیریں سبیر اپنی شادی کی تقریب میں دلہن بنی اسٹیج پر تھیں کہ اسی دوران کیٹرنگ ٹیم کی دو خواتین کی طبیعت اچانک خراب ہوگئی۔ ایک خاتون کو ناک سے خون بہنے لگا جبکہ دوسری کو چکر آئے اور وہ نڈھال محسوس کرنے لگی۔
اس موقع پر ڈاکٹر شیریں نے بغیر کسی ہچکچاہٹ کے اپنی شادی کی رسومات کو وقتی طور پر روک دیا اور دلہن کے لباس میں ہی مریض خواتین کے پاس پہنچ گئیں۔ انہوں نے فوری طور پر دونوں کا معائنہ کیا اور ابتدائی طبی امداد فراہم کی۔
ناک سے خون آنے والی خاتون کو انہوں نے ہدایت دی کہ وہ آگے کی طرف جھک کر ناک کے نرم حصے کو 10 سے 15 منٹ تک دبائے رکھیں اور منہ سے سانس لیں۔ جبکہ چکر آنے والی خاتون کو لٹا کر اس کی ٹانگیں اوپر کرنے کا کہا گیا تاکہ خون کی روانی بہتر ہو سکے۔
ڈاکٹر شیریں اس وقت مقامی اسپتال میں ایمرجنسی میڈیسن میں ایم ڈی کر رہی ہیں۔ ان کی پیشہ ورانہ تربیت نے انہیں اس صورتحال میں پُرسکون رہنے اور فوری مدد فراہم کرنے میں مدد دی۔
یہ لمحہ ویڈیو میں محفوظ ہوگیا جو بعد ازاں سوشل میڈیا پر وائرل ہوگیا جہاں صارفین نے ڈاکٹر دلہن کے جذبۂ انسانیت اور فرض شناسی کو خوب سراہا۔
ڈاکٹر شیریں کا کہنا تھا کہ شادی میں موجود لوگوں کو معلوم تھا کہ وہ ڈاکٹر ہیں، اسی لیے انہوں نے مدد کے لیے انہیں بلایا اور انہوں نے بطور ڈاکٹر اپنا فرض ادا کیا۔
Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگانیزخبر کے مندرجات سےادارے کا
متفق ہونا ضروری نہیں ۔اے آئی یا انٹرٹینمنٹ مواد صرف تفریح کے لیے ہے
