کراچی (پاکستان واچ نیوز)صدر ہمدرد فاؤنڈیشن پاکستان محترمہ سعدیہ راشد کی زیر صدارت “سیرت النبی صلی اللہ علیہ وسلم کی روشنی میں محبت، اخلاق اور عفووو درگزر” کے موضوع پر حمد باری تعالیٰ، ذکر رسول اللہ صلی اللہ علیہ وسلم، محفل میلاد اور رسم بسم اللہ سے سجی پروقار نونہال سیرت کانفرنس گزشتہ روز بیت الحکمہ آڈیٹوریم، مدینتہ الحکمہ میں منعقد ہوئی۔
مہمان خصوصی سابق ایکٹنگ وائس چانسلر جامعہ کراچی پروفیسر ڈاکٹر شائستہ تبسم نے کہا کہ سیرتِ رسول صلی اللہ علیہ وسلم کا مطالعہ کردار سازی اور عملی زندگی کی رہنمائی کا بہترین ذریعہ ہے۔ رسول اللہ صلی اللہ علیہ وسلم کی سیرتِ طیبہ کا ایک ایک لمحہ انسانیت کے لیے رحمت، برکت، اخلاق اور رہنمائی سے معمور ہے۔ ہمیں سیرتِ رسول صلی اللہ علیہ وسلم کا صرف مطالعہ ہی نہیں کرنا چاہیے بلکہ اس کی تعلیمات کو اپنی عملی زندگی کا حصہ بھی بنانا چاہیے۔ انہوں نے کہا کہ سیرتِ طیبہ ہمیں سچائی، امانت، دیانت، عدل اور انسانیت سے محبت کا درس دیتی ہے۔ ہمیں آباؤ اجداد سے چلی آنے والی روایات کو محض روایت کی بنیاد پر اختیار کرنے کے بجائے حق و باطل میں تمیز کرنے کی صلاحیت پیدا کرنی چاہیے۔ انہوں نے دینی تقاریر اور نعتوں میں الفاظ کے محتاط انتخاب کی ضرورت پر زور دیتے ہوئے کہا کہ عقیدت کا اظہار اسلامی عقائد کی حدود کے اندر رہ کر ہونا چاہیے۔ انہوں نے بچوں کی عمدہ تقاریر اور ان کی تیاری میں اساتذہ کی محنت کو سراہا اور شہید حکیم محمد سعید صاحب کی تعلیمی و تربیتی خدمات کو خراجِ تحسین پیش کیا۔ انہوں نے محترمہ سعدیہ راشد کے لیے صحت، عافیت اور مزید ہمت و توفیق کی دعا بھی کی۔
نونہال مقررین سیدہ ہانی (ہمدرد پبلک اسکول)، ملائیکہ ملک (نیو اسٹینڈرڈ پبلک اسکول)، مریم (دی اویسس پبلک اسکول) اور مصطفی نادر (عظیمی پبلک ہائر سیکنڈری اسکول) نے کہا کہ آپ صلی اللہ علیہ وسلم کی حیاتِ طیبہ رحمت ہی رحمت اور معافی ہی معافی سے عبارت ہے۔ اللہ تعالیٰ نے ہمیں غصے، نفرت اور تکبر سے منع فرمایا ہے اور رسول اللہ صلی اللہ علیہ وسلم نے بھی ان رویوں سے اجتناب کی تعلیم دی ہے۔ آپ صلی اللہ علیہ وسلم کی عملی زندگی رحمت، صبر، عفو و درگزر اور حسنِ اخلاق کی روشن مثال ہے۔
ہمیں بھی رسول اللہ صلی اللہ علیہ وسلم کے اسوۂ حسنہ پر عمل کرنے کی کوشش کرنی چاہیے۔ ہمیں اپنے دلوں میں محبت، رحم، صبر اور معافی کو جگہ دینی چاہیے۔
نونہال سیرت کانفرنس میں پرنور محفل میلاد کا بھی انعقاد کیا گیا، جس میں ہمدرد پبلک اسکول، ہمدرد ولیج اسکول سمیت مختلف اسکولوں سے تعلق رکھنے والے طلبہ نے حمد باری تعالیٰ اور نعتیہ کلام پیش کیے۔ اس موقع پر ہمدرد پاکستان کی مینجنگ ڈائریکٹر اینڈ سی ای او محترمہ فاطمہ منیر احمد، ہمدرد یونیورسٹی کے وائس چانسلر پروفیسر ڈاکٹر عمران امین، اساتذہ اور والدین بھی موجود تھے۔ نونہال سیرت کانفرنس کے اختتام پر نونہالوں نیمل امداد اور سیدہ عائشہ نقوی کی رسم بسم اللہ بھی ادا کی گئی۔ قاری حامد محمود الحسینی نے اختتامی دعا کروائی۔
Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگانیزخبر کے مندرجات سےادارے کا متفق ہونا ضروری نہیں ۔اے آئی یا انٹرٹینمنٹ مواد صرف تفریح کے لیے ہے
