لاہور میں اورنج لائن ٹرین کی تاریخ میں پہلی مرتبہ ایک خاتون نے ڈرائیونگ سیٹ سنبھال لی ہے۔ ندا صالح کو 6 ماہ کی ٹیکنیکل تربیت کے بعد باقاعدہ طور پر اورنج لائن ٹرین کی ڈرائیور مقرر کر دیا گیا ہے۔
پاکستان کو اپنی پہلی خاتون میٹرو ڈرائیور مل گئی ہے کیونکہ ندا صالح نے لاہور میں اورنج لائن میٹرو ٹرین کی ذمہ داری سنبھال لی ہے۔ 26 سالہ ندا نے اپنے سفر کا آغاز ایک ٹرانسپورٹ انجینئر کے طور پر کیا تھا، اس کے بعد وہ ایک تصدیق شدہ ٹرین آپریٹر بنی۔چینی انجینئرز کی رہنمائی میں، ندا نے اپنی ٹریننگ مکمل کی اور اورنج لائن چلانے کے لیے اہل ہو گئیں۔
وزیراعلیٰ پنجاب مریم نواز شریف نے مسرت کا اظہار کرتے ہوئے کہا ہے کہ ندا صالح جیسی بیٹیاں ہم سب کا فخر ہیں اور یہ اقدام اس بات کا ثبوت ہے کہ ہماری بیٹیاں کسی سے کم نہیں۔ انہوں نے کہا کہ پنجاب حکومت خواتین کو مساوی مواقع فراہم کرتی رہے گی اور ندا صالح کے لیے نیک تمناؤں کا اظہار بھی کیا۔
دوسری جانب لاہور میں ٹرانسپورٹ کے میدان میں ایک اور پیشرفت سامنے آئی ہے۔ میٹرو بس، اورنج لائن اور الیکٹرک بس کے بعد اب شہر کی سڑکوں پر جلد بجلی سے چلنے والی ٹرام بھی رواں دواں ہو گی۔
3 باکسز پر مشتمل یہ ٹرام مکمل طور پر الیکٹرک ہو گی، جو صرف 10 منٹ چارج کے بعد 25 سے 27 کلومیٹر فاصلہ طے کر سکے گی۔ اس میں 250 افراد کے بیٹھنے کی گنجائش ہو گی اور اس کی اسمبلنگ علی ٹاؤن ڈپو میں جاری ہے۔ منصوبے کو پہلے مرحلے میں پائلٹ پراجیکٹ کے طور پر شروع کیا جائے گا۔
Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگانیزخبر کے مندرجات سےادارے کا متفق ہونا ضروری نہیں ۔اے آئی یا انٹرٹینمنٹ مواد صرف تفریح کے لیے ہے
