کراچی(ویب ڈیسک )کے الیکٹرک نے شہر میں ہونے والی اعلانیہ اور غیر اعلانیہ لوڈ شیڈنگ کی وجہ ایل این جی کی فراہمی میں رکاوٹ کو قرار دیدیا۔کراچی کے مختلف علاقوں میں بجلی کی اعلانیہ اور غیر اعلانی لوڈشیڈنگ کا سلسلہ جاری ہے، شہر کے متعدد علاقوں میں لوڈشیڈنگ کا دورانیہ 16 گھنٹے سے بھی تجاوز کرگیا ہے۔لیاری، ملیر، لانڈھی اور کورنگی میں بجلی کی طویل لوڈشیڈنگ کی شکایات موصول ہو رہی ہیں۔ اس کے علاوہ اورنگی ٹاؤن، سرجانی ٹاؤن اور قائدآباد میں بھی لوڈشیڈنگ سے شہری پریشان ہیں جبکہ لائنز ایریا، نیو کراچی اور موسیٰ کالونی میں بھی بجلی کی بندش کی شکایات ہیں۔ ماڑی پور روڈ، مچھر کالونی اور ہاکس بے کے مختلف علاقوں میں بھی بجلی کی فراہمی متاثر ہے۔کراچی کے مختلف علاقوں میں کئی کئی گھنٹے بجلی بند رہنے سے شہریوں کو شدید مشکلات کا سامنا ہے۔شہریوں کا کہنا ہے کہ بجلی کے بل ادا کرنے والے صارفین کو بھی لوڈشیڈنگ سے استثنیٰ حاصل نہیں ہے جبکہ ترجمان کے الیکٹرک کا کہنا ہے بجلی چوری اور بلوں کی عدم ادائیگی والے علاقوں میں لوڈشیڈنگ کی جاتی ہے۔دوسری جانب کے الیکٹرک کی جانب سے فیس بک پیج پر کی گئی پوسٹ میں کہا گیا ہے کہ بین الاقوامی سطح پر سپلائی میں خلل اور کارگوز کی تاخیر کے باعث ملک بھر میں آر ایل این جی کی فراہمی میں رکاوٹ کا سامنا ہے، جس سے کے الیکٹرک سمیت ملک بھر میں بجلی کی پیداوار متاثر ہو رہی ہے۔کے الیکٹرک انتظامیہ کے مطابق اس صورتحال کے پیش نظر اگر ناگزیر ہوا تو کے-الیکٹرک کو انتہائی آخری حل کے طور پر شام یا رات کے پیک آورز کے دوران لوڈ مینجمنٹ کرنا پڑ سکتی ہے جبکہ دن کے اوقات میں بجلی کی فراہمی بدستور مستحکم رہے گی۔
Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگانیزخبر کے مندرجات سےادارے کا متفق ہونا ضروری نہیں ۔اے آئی یا انٹرٹینمنٹ مواد صرف تفریح کے لیے ہے
