پشاور(پاکستان واچ نیوز)آئی ایس پی آرکے زیر اہتمام ونٹر انٹرن شپ پروگرام 2026 پشاور میں کامیابی سے جاری ہے۔ اس سلسلے میں کور کمانڈر پشاور نے پروگرام میں شریک طلبہ کے ساتھ خصوصی نشست کی، جس میں خیبر پختونخوا کی سیکیورٹی صورتحال اور درپیش چیلنجز پر جامع گفتگو کی گئی۔نشست کے دوران کور کمانڈر نے صوبے میں امن و امان کی صورتحال، دہشت گردی کے خلاف جاری اقدامات اور قومی سلامتی کے تقاضوں پر تفصیلی بریفنگ دی۔ طلبہ کو سیکیورٹی چیلنجز سے نمٹنے کے لیے ریاستی اداروں کی حکمت عملی سے بھی آگاہ کیا گیا۔طلبہ نے پاک فوج کی قربانیوں اور پیشہ وارانہ مہارت کو سراہتے ہوئے بالخصوص معرکۂ حق میں دشمن کے خلاف جرأت اور استقامت کو خراج تحسین پیش کیا۔ ان کا کہنا تھا کہ پاک فوج نے ہر مشکل گھڑی میں قوم کے دفاع کو یقینی بنایا ہے۔شرکاء نے اس عزم کا اظہار کیا کہ وہ ڈیجیٹل محاذ پر پاکستان کے مثبت بیانیے کے محافظ بن کر قومی مفادات کے دفاع میں اپنا کردار ادا کرتے رہیں گے۔ طلبہ کے مطابق اس نشست کے بعد ان کی خیبر پختونخوا اور قومی معاملات کے حوالے سے فہم و فراست میں نمایاں اضافہ ہوا ہے۔انہوں نے اس بات پر زور دیا کہ نوجوانوں کو ڈیجیٹل محاذ پر دشمن کے پروپیگنڈے اور منفی بیانیے کے خلاف مضبوطی سے کھڑا ہونا چاہیے۔آخر میں طلبہ نے ونٹر انٹرن شپ پروگرام 2026 کے انعقاد پر پاک فوج اور آئی ایس پی آر کا شکریہ ادا کیا اور اس اقدام کو نوجوانوں کی فکری و قومی تربیت کے لیے اہم قرار دیا۔
Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگانیزخبر کے مندرجات سےادارے کا متفق ہونا ضروری نہیں ۔اے آئی یا انٹرٹینمنٹ مواد صرف تفریح کے لیے ہے
