کراچی (پاکستان واچ نیوز): شہید پاکستان حکیم محمد سعید کے 29ویں یومِ شہادت کی مناسبت سے ’’ایک چراغ جو آج بھی روشن ہے‘‘ کے عنوان سے ہمدرد نونہال اسمبلی اور ہمدرد شوریٰ کراچی کا مشترکہ اجلاس دی ایرینا، بحریہ ٹاؤن ٹاور میں منعقد ہوا۔ اجلاس کی میزبانی صدر ہمدرد فاؤنڈیشن پاکستان محترمہ سعدیہ راشد نے کی۔
اجلاس میں مقررین نے شہید حکیم محمد سعید کی علمی، طبی، تعلیمی اور فلاحی خدمات کو خراجِ عقیدت پیش کرتے ہوئے کہا کہ ان کا مشن آج بھی زندہ ہے اور نئی نسل کے لیے مشعلِ راہ ہے۔
محترمہ سعدیہ راشد نے طلبہ سے گفتگو کرتے ہوئے کہا کہ حکیم محمد سعید کی زندگی نظم و ضبط، وقت کی پابندی اور علم و عمل کی بہترین مثال تھی۔ انہوں نے بچوں کی تعلیم کے ساتھ تربیت اور کردار سازی کی اہمیت پر بھی زور دیا۔
دیگر مقررین، جن میں پروفیسر ڈاکٹر جعفر احمد، سینیٹر عبدالحسیب خان، بریگیڈیئر (ر) طارق خلیل اور کرنل (ر) مختار احمد بٹ شامل تھے، نے کہا کہ شہید حکیم محمد سعید نے محدود وسائل سے اپنی عملی زندگی کا آغاز کیا اور محنت، دیانت داری اور خدمتِ انسانیت کے جذبے سے ایک عظیم مشن کی بنیاد رکھی۔
نونہال مقررین نے بھی حکیم محمد سعید کی خدمات کو خراجِ تحسین پیش کیا۔ اجلاس کے اختتام پر مقررین نے اس عزم کا اظہار کیا کہ ان کے علمی، تعلیمی اور فلاحی مشن کو آگے بڑھایا جائے گا۔ اس موقع پر ہما بیگ اور کلیم چغتائی نے منظوم کلام بھی پیش کیا۔
Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگانیزخبر کے مندرجات سےادارے کا متفق ہونا ضروری نہیں ۔اے آئی یا انٹرٹینمنٹ مواد صرف تفریح کے لیے ہے
